Dubai-liggies

Met verwysing na die vorige post, hier is die liggies wat in die omgewing van Zaabeel-paleis opgegaan het, van so twee dae voor Kersfees en gisteraand was dit nog daar. Nou kyk, in Dubai is daar nie ‘n teken van Kersfees nie (tensy jy Kersfees-shopping en Kersbome in winkelsentrums tel), maar toe hierdie liggies begin opgaan, het ek gedink dis nou nice. Dubai is mos ‘verwelkomend’ teenoor alle nasies. Maar toe was dit nie vir Kersfees nie, dit was vir die troue van sjeik Maktoum se dogter (hy’t seker baie). In elk geval, die strate daar by die paleis lyk nou mooi.

Gelukkige nuwejaar! Dis 1430!

Wat ‘n verrassing. Ek was bietjie lanklaas hier en nou lyk WordPress sommer heeltemal anders. Die feesseisoen in Dubai voel asof dit nou al ‘n maand lank aanhou, en, om die waarheid te se, dit gaan nou al ‘n maand aan. Maar ons is ook nou al ‘n goeie twee weke of wat effe van die buitewereld afgesny want die internetkabels by Egipte is al weer deur ‘n skip se anker gesleep. Nou gaan die kuber-verkeer via Amerika en die Verre Ooste, dit vat baie, baie lank om ‘n webwerf te laai. Dis darem al beter as ‘n week of wat gelede, toe was ons so goed soos afgesny, mens kon niks oopmaak nie. Nokia se music-webwerf het pas hier oopgemaak, en vir iemand soos ek wat nie in SA itunes se musiek kon koop nie, was dit ‘n wonderlike ervaring. Eindelik kon ek musiek op die internet koop, vir goedkoper as die album in die winkel. Maar die eerste dag toe ek probeer aflaai, het dit letterlik die hele nag gevat vir een album! (Mariah Carey se Merry Christmas). Dis darem nou al heelwat beter, die konneksie is so ver ek weet nog nie heeltemal herstel nie, maar dis darem beter.

Gepraat van Mariah Carey en Kersfees. Die feesseisoen het hier in die VAE op 2 Desember begin (Nasionale Dag – wat ‘n gemors was dit nie. Die mense hier vier Nasionale Dag deur hul karre te ref totdat die enjin letterlik klap terwyl hulle deur die strate jaag. Zef.) Kyk hier:

Toe was dit Eid Al Adha, vir drie dae lank, toe Kersfees, wat natuurlik nie gevier word nie, daar was enkele winkelsentrums met Kersbome en natuurlik het al wat ‘n hotel is Kersetes aangebied (want dis nog ‘n manier om geld te maak). Nou vandag is dit die Moslem nuwejaar. Dis die eerste dag van die jaar 1430! En die 1ste, snaaks genoeg, is die Westerse nuwejaar ook ‘n openbare vakansiedag.

Ek was Kersfees nogal op die uitkyk vir enigiets wat effens die Kersfees-gees gee (natuurlik te veel gevra hier), wat daar was, was kommersialisme in al wat winkel en hotel was, en toe so twee dae voor Kersfees begin die liggies opgaan naby die regeerder se paleis in Zaabeel. Maar natuurlik het enige mooi gevoelens oor Kersfeesliggies gou soos mis voor die son verdwyn. Derduisende dirham se liggies wat die strate vol opgesit is, was alles vir een of ander troue van die regeerder se familie. Niks mooigeit vir Kersfees nie, net liggies vir een familie se troue. Die hele stad vol. Selfugtige spul.

Hier is iets mooier, twee onlangse foto’s van my en Jay.

Op die Dubai-Abu Dhabi snelweg.

By die Zayed Sportstadion in Abu Dhabi, waar ons die George Michael-konsert bygewoon het.

Die wysheid van leierskap, aka How to be a benign despot

Niemand sal wil voorgee dat die VAE ‘n demokrasie is nie (al skryf die koerant waar ek werk gereeld op die voorblad oor ‘meer demokrasie’). Dis eintlik maar ‘n diktatuur. Maar so leer ek toe uit my eie koerant daar is maniere om te maak asof jy die beste heerser op aarde is, al is jy eintlik ‘n despoot. Die regering het onlangs ‘n wet afgevaardig dat alle motors ouer as 20 jaar verbied sal word. Jy sou ook nie toegelaat word om karre ouer as 15 jaar te verkoop nie. Die rede was ‘veiligheid’. Die eintlik rede is natuurlik geld, so dwing hulle almal om gereeld nuwe karre te koop, die kar-plekke maak meer wins en die banke maak meer geld met al die lenings. Maar uit die bloute word die wet toe nou die dag ‘tydelik herroep’. Op die voorblad van my koerant verskyn die volgende berig toe een goeie dag:

Rule banning 20-year-old vehicles postponed

Dubai: Vehicles more than 20 years old will still be allowed on the UAE’s roads following instruction from President His Highness Shaikh Khalifa Bin Zayed Al Nahyan. The decision, issued on Sunday, postpones implementation of ministerial decision No. 535, 2008, which bans vehicles older than 20 years old on the country’s roads. The decision was directed to take effect from Monday, December 1. In a statement issued by the Ministry of Interior, Lieutenant General Shaikh Saif Bin Zayed Al Nahyan, Minister of Interior said on Sunday that the decision was suspended, which set a cut-off date for the renewal of car registrations, for cars manufactured from 1988. bla bla bla en dan die volgende juweeltjie: Shaikh Saif thanked Shaikh Khalifa for his wise leadership and for serving the best interests of the UAE public. Die wysheid van leierskap. Maak ‘n totaal onmenslike wet en teken dit (hier is baie mense wat nie ryk is nie, anders as wat mense dalk dink, wat net eenvoudig nie nuwe karre kan bekostig nie), en dan prys jy jou eie stert dat jy jou eie onmenslike wet herroep het . . .

Op ‘n eiland

Op pad na Subic Bay vanaf Santa Rita in die Filippyne. Die land is deurtrek van die ryslande, dis skouspelagtig mooi. Hierdie rysplukkers was op pad terug na die dag se werk. Daar is 7107 eilande in die Filippyne. Ek was net op een.

‘n Tricycle, een van die baie verskillende goeters waarmee jy die pad deel. Ek het self bestuur in die Filippyne en jy moet nogal mooi kyk vir al die ander mense, fietse, waterbuffels, honde, katte, koetse (letterlik) en wat nog alles op die pad.

Dit lyk miskien na net nog ‘n snelweg, maar dis die Subic-Clark Expressway. Wat dit heeltemal anders as al die ander snelwee in die wereld maak, is dat daar geen uitgange is nie . . . Dit het ons op die harde manier uitgevind. Jy klim by Subic Bay op die snelweg, en dan klim jy by Clark, so 60km verder, weer af. Want al die ander uitgange word nog gebou . . . Ons moes vroeer afklim van die snelweg, maar moes toe noodgedwonge deurry tot in Clark en weer terugry na Santa Rita op ‘n ander pad. Die snelweg was ook besonder leeg.

Jay besig om lekker vars mielies langs die pad te koop. Naby Angeles City.

Dit lyk miskien na net nog ‘n gewone koloniale katedraal, maar hierdie een en baie ander soos hy in Pampanga is spesiaal. Hierdie is net die helfte van die kerk. Die ander helfte is begrawe onder lahar (vulkaniese as), want hierdie kerk, in Bacolor, naby Santa Rita, was in die pad van Berg Pinatubo se uitbarsting. Groot dele van Santa Rita en omgewing is gevolglik veel hoer as wat dit was voor die uitbarsting, want die vulkaniese as het baie geboue begrawe, of baie net halfpad begrawe, soos hierdie kerk. In Santa Rita bly baie mense wel nog in hul ou huise, maar net in die boonste helfte wat nie begrawe is nie.

So lyk rys van naby. Ek het dit nog nooit voorheen gesien nie.

Dit is ‘n jeepney. ‘n Filippynse minibus.

Filippynse fees

Die Filipinos ken van kos. Ons het die week wat ons daar was, heeltemal te veel geeet. Hier is een van die feestafels tydens die fiesta, en ‘n vrolike groepie Filipinos en een Suid-Afrikaner. Op die kosvideo is daar opgestopte vis, hulle noem dit Bangus relleno. Dis vis wat gestop word met varkvleis, besonder lekker. Varkvles is die groot feeskos, daar is allerhande soorte varkgeregte, en mens kan ook op die video ‘n Filippynse nagereg sien. Hulle maak iets wat hulle noem leche flan, dis soos creme caramel, net minder soet en baie lekkerder. Daar is ook ‘n dis genaamd halo halo, dis nagereg, leche flan, vrugte, allerhande ander soetgoed, wat alles gemeng word met ysbrokkies. Heerlik op ‘n warm tropiese dag. Filippynse kos is ‘n mengsel van Spaanse, Amerikaanse en Filippynse invloede. My videokamera is widescreen, hierdie video het ek reg geconvert met die regte dimensies. Die drie videos in die post hierna is bietjie saamgepers, almal lyk ietwat maar. Ek leer nog met die nuwe videokamera . . .

Fiesta in Pampanga

Na my besoek aan Suid-Afrika het ek ook vir ‘n week na die Filippyne gegaan. Ek het meestal in Santa Rita, Pampanga, net noord van Manila, gebly. Dis ‘n kleinerige dorpie. Terwyl ons daar was, was daar ‘n fiesta ter ere van die dorp se heilige, Santa Rita. Die Filippyne was een van die plekke in Asie waar ek nog nie was nie, en wat ‘n interessante plek. Die land se geskiedenis is heeltemal anders as die res van Asie siende dat dit baie, baie lank ‘n Spaanse kolonie was en toe ook ‘n Amerikaanse kolonie. Dit het my soms vreeslik baie aan Suid-Amerika laat dink, lyk selfs dieselfde op plekke. Daar is vreeslik baie Spaanse katedrale en Spaanse dorpe, net soos in Suid-Amerika. Ek het self bestuur daar en dit was weer iets heel anders, die padtekens is alles Amerikaanse styl en ek was soms erg verward, as daar ‘n wit sperstreep aan die kant van die pad is, kan jy blykbaar oor dit ry, maar ‘n soliede geelstreep in die middel van die pad beteken jy mag nie verbysteek nie. Natuurlik ignoree die plaaslike inwoners al die tekens volstrek. Dit was nogal uitmergelend om daar te bestuur, want jy deel die baie nou paadjies met jeepneys (soos minibusse by die huis), fietse met sykarre, busse, karre, fietse, riksjas, motorfietse en voetgangers, honde, katte, waterbuffels, bokke en meer. Ek het ‘n Camry gehuur, wat ‘n fout was want die kar is net eenvoudig te groot vir die paaie. Volgende keer vat ek die kleinste motor wat ek kry. Hier is ‘n paar videos van die fiesta wat ons bygewoon het, hierdie drie videos is van die straatoptogte. O, interessant genoeg, daar is sekerheidswagte by al die winkelsentrums en baie streng sekuriteit in parkeerareas teen motordiefstal. Baie, baie strenger as in SA. Hulle deursoek jou vir gewere en messe as jy by ‘n winkelsentrum ingaan.

Back in the UAE

Ek is jammer ek het so lanklaas gepost, ek was weg met vakansie, tuis en in die Filippyne. Daar is darem geen plek soos Suid-Afrika nie, ek het elke oomblik van die vakansie geniet. Ek was veral beindruk met die kwaliteit van die nasionale parke. En die standaard van diens oral.

Ek wil net graag aan al die ou spul negatiewe siele wat die wereld vol loop en verkondig hoe standaarde in SA verswak ens ens, se dat hulle bietjie hul oe moet oopmaak. Ek weet waarvan ek praat, my naam is nie verniet rondloper nie, ek ken die wereld, en goed, nie deur die bril van pakket-toere en glansreise op bote of sulke dinge nie, ek het al behoorlik gesien hoe leef mense in baie, baie lande. Ek was nou pas in die Filippyne en dit is ‘n pragtige land, maar ook met ‘n misdaadprobleem. Daar is meer sekuriteit as wat ek in SA gesien het op die hoogtepunt van die vryheidstryd. Maar, ek het nog nie een Filippyn ontmoet (en ek ken baie van hulle) wat selfs vir wildvreemdes begin vertel van sy land se misdaadprobleem nie. Die Suid-Afrikaners wat dit elke dag die wereld vol doen steek my regtig dwars in die krop. Dis mense met geen trots nie, en as jy my vra, ernstige minderwaardigheidskomplekse. Daar is niks fout met SA nie. Inteendeel, dit is een van die snelgroeindste lande ter wereld. Die ‘nuwe’ nasionale parke is byvoorbeeld ‘n toonbeeld van vooruitgang. Ek was in Kruger en Golden Gate. Albei spog met nuwe kampe, nuwe restaurante, top-diens, dis maklik en doeltreffend om plek te bespreek op die internet, daar is net niks fout nie. Waar in die ‘ou’ nasionale parke jy maande, selfs jare, vooraf moes bespreek en jouself moes gelukkig ag as jy die ‘lotery’ vir plek gewen het. Want al die Natte se pelle het reeds lankal die beste kampe vir hulself opge-eien. Nou wemel die park van buitelandse toeriste, die diens is goed, die blyplekke is veel beter as voorheen.

Hier is solank ‘n paar foto’s van SA.

Ek en Jay by die Groot Gat in Kimberley. Die museum daar spog met 'n pragtige nuwe besoekersentrum.

Jay op die Havengabrug, 'n minder bekende oorgang oor die Oranje. Pragtig.

Die nuwe kamp by Golden Gate. Dis hoog bo teen die berg, daar is net ses of agt van hierdie huise. Jy kry twee slaapkamers, 'n heerlike kaggel in die sitkamer, en absolute stilte.

En jy kry natuurlik pragtige uitsigte.

Hierdie kalant het vir ons kom kuier in Kruger.

Almal weet wat dit is.

Reg langs die pad.

Lank gelede

Ek is skoon nostalgies vandag. Sit en speel op youtube, wat sekerlik die beste uitvinding in die geskiedenis van die mensdom is. Mens kry die vreemdste videos uit die jare toet as jy eers begin soek, TV-programme wat mens al lankal van vergeet het. So kom ek af op die temawysie vir Vyfster, dit gee seker my ouderdom behoorlik weg, want dis jare en jare gelede. Ek onthou ek het net soms daarna gekyk, want om een of ander rede wou my ma-hulle nie toelaat dat ons dit kyk nie. Die temawysie is so tipies nostalgies Afrikaans. En mens sien al die ou name in die Afrikaane TV-wereld, mense wat jy al van vergeet het.

Toring van Babel

Die somer in Dubai is nie ‘n mooi tyd nie. Dis net stof en dis omtrent altyd wat die weermense noem ‘hazy’. Maar nou die dag toe ek ry, was dit effens helderder as gewoonlik en daar hang daar sulke lae wolke oor die stad. Nogal ongewoon. Met die Burj Dubai, die hoogste gebou in die wereld (hy’t so 188 verdiepings) se spits wat bokant die wolke uitsteek. Dit was nou ‘n mooi gesig. Hierdie video wys sommer ook so ‘n bietjie hoe lyk die snelwee in Dubai, en mens kan mooi hoor wat praat hulle alles op die radio oor die verkeersprobleme. Kyk mooi vir die Burj Dubai, mens kan op party plekke in die video sien waar sy spits bo die wolke uitsteek. Mens kan ‘n liggie sien flikker daar. Heel aan die begin van die video is een van daai groot propagandaborde met een van die heersende sjeiks op wat oral in Dubai te sien is. Daar is ooreenkomste met Noord-Korea.

Op ‘n dhow

Vir my verjaardag het ons gisteraand gaan seil op hierdie dhow. Hulle bedien aandete en seil op die Creek in Dubai. Dis soos 'n rivier wat deur die stad loop, maar dis seewater. Die boot seil tot amper waar die see by die Creek invloei, dis 'n heerlike rustige manier om 'n heel ander uitsig op Dubai te kry. Met al die bouwerk hier is die stad soms maar 'n groot bouterrein, maar die dele langs die Creek is alles ouer dele en dit was regtig nogals besonders om dit van die water te sien. Baie moskees en mens hoor die muezzin wat sing, nogal mooi as dit so oor die water weergalm. Hoogs aan te beveel vir besoekers aan Dubai.

Hierdie is heel voor op die dek, met die see reg voor ons. Met 'n drankie, vir 'n verandering, want dis 'n spesiale dag.