Archive for February 2008
Grotmanne en kerse
Die ander dag toe ek op Strydenburg was om stil en rustig op my eie tydelik afskeid te neem van my huis, sit ek daar in die sitkamer en geniet ‘n goedkoop bier, iets wat my ongelukkig nie meer in Dubai beskore gaan wees nie, toe die krag uitskop. Steek toe maar al die kerse wat die hele huis vol staan aan (daar is oral kerse en kandelare, ek dink as die locals daar inkom sou hulle my van vreemde dinge beskuldig, miskien ook omdat daar allerhande heidense prentjies en beelde oral in die huis is). Soos die biertjie vloei en die kerse brand en alles baie, baie stil raak (want daar’s mos nie krag nie) merk ek toe (want ‘n vlam is tog hipnotiserend, in die dae voor TV het grotmanne na die vlamme van hul vure gestaar om die aand om te kry terwyl die vroue velle brei vir die strooibeddens) hoeveel motte en goetertjies vlieg reguit na hul dood die lig in. Ek was reg om hier heel filosofies te raak oor die soeke na die lig en dan as jy dit kry, dit wat jy nog altyd gesoek het, dan is alles ook verby, vir ‘n millisekonde is alles helder en lig en skoon en reg, en dan, boem, pikgitswartdonker, vir ewig. Toe herinner iemand my aan Langenhoven se gedig. Hy stel dit dalk beter as wat ek kan.
DIE MOT EN DIE KERS
Ek meen Langenhoven se kers wys eerder op iets soos die verbode vrug, die sonde selfs, vir my is die kers se lig eenvoudig net dit, die lig. En lig is goed, dis nie verkeerd of verbode nie. Maar tog, as jy te naby kom . . .
Robbie se video
Vir diegene wat gewonder het, soos ekself, maar hoe sing hy nou eintlik?
Nog ‘n bietjie Dubai
Hier is nog so ‘n paar foto’s van laasweek se trippie in Dubai. Oor ‘n maand of wat as ek daar bly, sal daar nog baie, baie meer wees. Die spesery-markte is vir my wonderlik, oor al die reuke wat in die lug hang. Wierook, mirre, kaneel, allerhande soet reuke wat swaar in die lug hang. Daar is ook ‘n goudmark waar ek nog nie was nie, blykbaar word die mees kosbare goudprodukte sommer so oop en bloot uitgestal.
Reik na die sterre. Die hoogste gebou ter wêreld, niks anders kom naby daaraan nie. Toe die mense van Babilon jare gelede in min of meer dieselfde omgewing dieselfde wou doen, het hulle bietjie probleme opgetel. Nou is die tegnologie beter.
Sommer net ‘n uitsig op die Creek (die woordeboek sê dis ‘n inham in Afrikaans . . . ) Dis ‘n hele groot stuk water wat diep die binneland inloop van die see af, wat ‘n groot deel van die stad in twee verdeel
Op die water dink ‘n mens diep.
Lugverkoelde riviertaxi. Dit kos 1 dirham (R2) om van die een kant na die ander kant te vaar.
Alles word onthul
Ek kan nou meer onthul. My werksonderhoud in Dubai het goed afgeloop, ek het ‘n werksaanbod gekry. My kort reis soontoe van vier dae was genoeg om my te oortuig dat ek graag ‘n tyd lank daar sal woon, die mengsel van die hele wereld wat daar byeen kom is vir my baie interessant. Dus, as alles goed gaan, woon ek binne ‘n maand of wat daar.
En dan sal ek hierdie sien as ek met die watertaxi rondry.
Maar eintlik meer van hierdie.
Dubai, waar die oue en die nuwe elke dag onmoet, en die mense van die hele wereld die spreekwoordelike pot goud aan die einde van die reenboog gaan soek.
Van heinde en verre
Rondloper loop weer rond. Kan dit dan ook nou anders. Ek is op kort kennisgewing teen geen koste aan myself nie, in Dubai. Ek was bietjie besig terwyl ek hier was, vandag was my eerste vry dag, so ek het die hele dag rondgeloop en verken. Die meeste mense wat hier woon kom van Indie en Sri Lanka, dan van die Ooste en omtrent elke ander land in die wereld. Dit dra by tot ‘n heel internasionale atmosfeer, ietwat disorienterend. Die rede vir my besoek is ‘n staatsgeheim, maar tot dusver het alles goed gegaan. Wanneer ek finale sekerheid het, onthul ek alles. Ek het lekker foto’s, maar ek het my kabels by die huis vergeet, sal oplaai as ek terug is.
Site blocked
Wanneer ‘n mens flickr (en seker vele ander websites) probeer oopmaak in Dubai kry jy die volgende boodskap:
We apologize the site you are attempting to visit has been blocked due to its content being inconsistent with the religious, cultural, political and moral values of the United Arab Emirates.
